Çin Rusiyanı “Boeing” və “Airbus” təyyarələrinə rəqib kimi 2017-ci ildən hazırlanmaqda olan CR929 sərnişin təyyarəsi layihəsindən kənarlaşdırıb.
"Bu barədə “The Air Current” nəşri yazır.
Fransanın Le Burje şəhərində keçirilən beynəlxalq aviaşousunda Çin 280 sərnişini qəbul edə biləcək gələcək uzaqməsafəli təyyarəyə ayrıca stend ayırıb. Eyni zamanda, Çin projeni özününkü kimi təqdim edib - Rusiyanın adını çəkmədən.
Keçən il “South China Morning Post” layihə ilə bağlı Çin və Rusiya arasında fikir ayrılıqlarının getdikcə artdığını yazmışdı. Çinlilər rusların layihənin onlara aid hissəsinin - füzelajın reallaşdırılmasında ləngliyindən narazı olublar. Çinlilərin laynerlə bağlı işlərə Qərb şirkətlərini cəlb etmək istəməsi isə rusların xoşuna gəlməyib.
“Pekin CR-929 sərnişin təyyarəsinin Qərbin uçuşa yararlılıq standartlarına cavab verəcəyinə ümid edir. Geniş gövdəli təyyarə ABŞ və Avropaya uçuşlar üçün nəzərdə tutulub, ona görə də Avropa və ABŞ istehsalçıları arasında sifarişləri bölməklə bəzi əsas komponentləri seçmək daha yaxşı olardı. Rusiya tərəfi Pekinin Qərb komponentlərindən istifadə etmək qərarını Ukraynaya müdaxiləsindən sonra qlobal sanksiyalar fonunda Qərb qarşısında ağ bayraq qaldırmaq kimi qiymətləndirir”, - qəzet bildirir.
Rusiya neft məhsulları və nefti üçün Çin bazarını sürətlə itirir. Hindistanla birlikdə Rusiya neftinin 80 faizdən çoxunu alan Çin iyunda alışlarını yarıya endirib. Çin neft emalı zavodları Rusiya əvəzinə İran neftinə üstünlük verirlər, bu baxımdan endirim daha böyükdür.(Teleqraf.com)
