"Azərbaycan Prezidenti İlham Əliyevin tələbləri və şərtləri Rusiyaya yamanca yer edib və şimal qonşumuz məsuliyyətini anlayıb baş vermiş faciənin obyektiv araşdırılmasına töhfə vermək əvəzinə media resurslarını işə salaraq üstümüzə hürdürür".
Bu sözləri AzTV-nin rəhbəri Rövşən Məmmədov AZAL təyyarəsinin Qazaxıstanın Aktau şəhərində Rusiya tərəfindən vurulması ilə bağlı danışarkən deyib. O, Rusiyanın məsuliyyətdən yayınmaq üçün uğursuz müqayisələr apardığını bildirib:
"Gah məsuliyyəti tam şəkildə ekipaj üzvlərinin üzərinə atmağa çalışır. Hətta bu məqsədlə yalançı səs yazılarından belə istifadə edir. Rəsmi şəxslər indidən Rusiya mediasında yayılan səslərlə qara qutudakı məlumatların uyğun gəlmədiyini bildirir.
Üstəlik, bəzi məlumatlarda təyyarənin vurulması əmrinin kim tərəfindən verildiyi də artıq dəqiqləşib. Gah da 2020-ci ilin noyabrında baş verən insidenti xatırladır və uğursuz paralellər aparmağa çalışır.
Hörmətli rusiyalı həmkarlar, əgər paralellik aparmaq istəyirsinizsə, çox yaxşı, gəlin, birgə aparaq.
2020-ci il noyabrın 9-da Rusiyaya məxsus helikopter Naxçıvan sərhədində vurulub. Niyə? Çünki həmin helikopter müharibənin hələ davam etdiyi zamanda noyabrın 9-da konkret Ermənistan-Azərbaycan sərhədinin Naxçıvan hissəsində axşam saatlarında erməni hərbçilərini müşayiət edərkən və aşağı hündürlükdə uçarkən vurulub. Niyə aşağı hündürlükdə uçurdu? Çünki helikopter hava müdafiə sisteminin radar müşahidəsinə tuş gəlməməyə çalışırdı. Başqa sözlə, missiyasını gizli yerinə yetirirdi. Missiya erməni hərbçilərini qorumaq idi. Bunu Rusiya tərəfi necə izah edə bilər? Müharibənin faktiki ən gərgin və çətin zamanında belə bir insidentin yaşanmasına Azərbaycan tərəfi onlarla əsas gətirərdi, lakin rəsmi Bakı bunu etmədi. Əvəzində İlham Əliyev hadisəyə görə rusiyalı həmkarına zəng etdi və üzr istədi. Daha sonra helikopterin məbləği ödənildi, ölən hərbçilərə görə ailələrinə kompensasiya verildi. Bir sözlə, bu cür vəziyyətlərdə dövlətin üzərinə hansı öhdəlik düşürdüsə, onu da yerinə yetirdik. Bir ləyaqət, kişilik nümunəsi ortaya qoyduq. İndi də belə bir ləyaqətli və kişiliyə yaraşan addım atmaq növbəsi Rusiya Prezidenti Vladimir Putindədir. Vəssalam! Məsələni bu qədər qəlizləşdirməyə, yaxud yaxın tarixi vərəqləməyə nə ehtiyac var?!"
<embed width="640" height="360" src="https://player.olke.az?v=39138&share_user_id=" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></embed>
