Çində arxeoloqlar İpək Yolunun ən qədim şəhərlərindən birini aşkar ediblər. Bu şəhərin Şan sülaləsinə aid olduğu və 3000 ildən çox yaşı olduğu müəyyən edilib.
bu barədə "Interesting Engineering" jurnalına istinadən xəbər verir.
Şəhər qədim Şan sülaləsinin dövrünə aid edilən Niuluçonq adlı yaşayış məskəni kimi tanınır. O, Linnan bölgəsində yerləşir və İpək Yolunun başlanğıc nöqtələrindən biri hesab olunur.
İlk araşdırmalar zamanı arxeoloqlar bu yaşayış məskəninin erkən neolit dövründən Şan sülaləsinin ilk dövrlərinə qədər uzanan dövrlərə aid olduğunu təxmin edirdilər. Lakin daha dərindən araşdırmalar göstərdi ki, bu, Şan sülaləsinin son dövrlərinə aid qədim şəhərdir.
Arxeoloq Xe Anyi bildirib ki, qazıntı sahəsində şəhər divarlarının yaxşı qorunub saxlanıldığı aşkar edilib. Qərb divarının ən yüksək hissəsi 1,4 metr hündürlükdədir.
Qazıntılar zamanı kül çuxurları, dirək yuvaları, keramika, daş alətlər və bronz qılıncın qalıqları tapılıb. Ancaq qılıncın vəziyyətinin çox pis olması onun təsdiqlənməsini çətinləşdirir.
Arxeoloqlar həmçinin qazıntı yerindəki xəndəklərin qeyri-adi olduğunu və o dövrün digər yaşayış məskənlərindən fərqləndiyini bildiriblər. Bu, inkişaf etmiş bir xüsusiyyətin və ya o dövr üçün nadir olan bir yeniliyin göstəricisi ola bilər.
Şan sülaləsinin erkən dövrlərinə aid bu qədim şəhərdə araşdırmalar davam etdiriləcək. Tapılan artefaktlar, qədim Çinin ikinci ən qədim idarəçiliyi olan Şan sülaləsi (e.ə. 1600-1050) və Linnan bölgəsi haqqında daha ətraflı məlumatlar əldə etməyə imkan verəcək. /Qaynarinfo
