İsrail Müdafiə Qüvvələrinin Suriyanın Dəməşq əyalətindəki Beyt Jann şəhərinə endirdiyi zərbələr nəticəsində ölənlərin sayı 20-yə çatıb.
Məlumatı Syria TV Suriyanın Xarici İşlər Nazirliyindəki mənbəyə istinadən yayıb.
Daha əvvəl verilən məlumatda zərbə nəticəsində qadınlar və uşaqlar da daxil olmaqla 13 nəfərin həlak olduğu, 25 nəfərin yaralandığı bildirilmişdi.
Qeyd edək dünən İsrail ordusu Suriyanın Beyt Jann şəhərinə hava hücumları və artilleriya zərbələri endirib. İsrail hərbi patrulunun əraziyə daxil olduğu və bunun patrulla yerli sakinlər arasında toqquşmalara səbəb olduğu bildirilirdi. Syria TV-nin məlumatına görə, basqın zamanı üç nəfər saxlanılıb.
Suriya Xarici İşlər Nazirliyi İsrailin zərbələrini qətiyyətlə pisləyərək onları müharibə cinayəti adlandırıb.
