Ukrayna prezidenti Volodimir Zelenski Qərb ölkələrini Belarus və İran xalqlarına yetərincə dəstək verməməkdə kəskin tənqid edib və bunun ağır geosiyasi nəticələr doğurduğunu bildirib.
Zelenski bəyanatında Qərbin passiv mövqeyinin Rusiyanın Belarus ərazisində “Oreşnik” tipli raketlər yerləşdirməsinə yol açdığını vurğulayıb. Onun sözlərinə görə, bu raketlərin uçuş radiusu Avropanın bir sıra paytaxtlarını əhatə edir və ciddi təhlükə yaradır:
“Əgər vaxtında Belarus və İran xalqlarına real dəstək göstərilsəydi, bu gün Avropa şəhərləri Rusiya raketlərinin hədəfi altında qalmazdı. Qərbin səssizliyi təhlükəsizlik baxımından ağır nəticələr doğurdu”, – deyə Zelenski qeyd edib.
Ukrayna lideri çıxışında Çin və bəzi digər dövlətləri də tənqid edərək, onların Rusiyaya qarşı tətbiq olunan sanksiyaların dolanılmasına yardım göstərdiyini bildirib. Zelenskinin sözlərinə görə, bu ölkələr dolayı yollarla Moskvaya texnologiya, komponentlər və maliyyə resursları ötürərək müharibənin uzanmasına şərait yaradırlar.
“Sanksiyaların effektivliyi yalnız kağız üzərində olmamalıdır. Onların real icrası vacibdir. Əks halda, Rusiya hərbi imkanlarını genişləndirməkdə davam edəcək”, – deyə Ukrayna prezidenti vurğulayıb.
Ekspertlərin fikrincə, Zelenskinin bu çıxışı Qərbə ünvanlanan açıq xəbərdarlıqdır və Avropanın təhlükəsizlik arxitekturasında yaranan boşluqlara diqqət çəkmək məqsədi daşıyır. Xüsusilə Belarus ərazisində Rusiya raketlərinin yerləşdirilməsi Avropa paytaxtları üçün birbaşa hərbi risk kimi qiymətləndirilir.
