Ukrayna ətrafında aparılan danışıqlarda yüksək nəticə əldə olunacağına ümid etmək düzgün deyil, qarşıda çox mürəkkəb və uzunmüddətli proses dayanır.
Bu barədə Rusiya prezidenti Vladimir Putinin mətbuat katibi Dmitri Peskov jurnalistlərə açıqlamasında bildirib.
Peskov qeyd edib ki, Ukrayna üzrə üçtərəfli təmasların davamı gələn həftəyə planlaşdırılır, lakin dəqiq tarix hələ müəyyən edilməyib. Onun sözlərinə görə, bu danışıqlarda dostyana mühit gözləmək çətindir, amma proses gedirsə, mütləq nəyəsə nail olmağa cəhd göstərilməlidir.
Kreml sözçüsü vurğulayıb ki, “Ankoric formulu”nun tərkib hissəsi olan ərazi məsələsi Rusiya üçün prinsipial əhəmiyyət daşıyır və bu mövqe Ukrayna böhranının tənzimlənməsi çərçivəsində dəyişməz qalır.
Peskov həmçinin Vladimir Putinin qrafikində hazırda ABŞ prezidenti Donald Tramp ilə telefon danışığının nəzərdə tutulmadığını bildirib. Bununla belə, o qeyd edib ki, belə təmaslar adətən operativ şəkildə razılaşdırılır və qısa müddətdə baş tuta bilər.
Kremlin nümayəndəsi beynəlxalq gündəmdəki digər gərgin mövzulara da toxunub. Onun sözlərinə görə, ABŞ-ın Kubaya qarşı mümkün hərbi-dəniz blokadası ilə bağlı yayılan məlumatlar ciddi narahatlıq doğurur. Eyni zamanda, Rusiya yeni Venesuela rəhbərliyi ilə daimi əlaqə saxlayır və regiondakı prosesləri diqqətlə izləyir.
Peskov bildirib ki, ABŞ-ın İrana qarşı növbəti mümkün hərbi zərbəsi Yaxın Şərqdə vəziyyəti daha da gərginləşdirə və regionda destabilizasiyanı dərinləşdirə bilər. Bu baxımdan Moskva bütün maraqlı tərəfləri təmkinə və məsuliyyətli davranmağa çağırır.
Kremlin bu açıqlamaları Ukrayna müharibəsi fonunda qlobal siyasi gərginliyin artdığı bir dövrə təsadüf edir və yaxın gələcəkdə beynəlxalq münasibətlərdə yeni risklərin yarana biləcəyinə işarə edir.
