Çin hökuməti İrandakı gərginliyin artması fonunda öz vətəndaşlarına müraciət edərək ölkəni ən qısa zamanda tərk etməyə çağırıb.
Çin Xarici İşlər Nazirliyi İrandakı mövcud vəziyyəti "mürəkkəb və qeyri-sabit" kimi qiymətləndirərək, vətəndaşlarına dərhal ölkədən çıxmağı və ya daha təhlükəsiz bölgələrə sığınmağı tövsiyə edib. Hava məkanının qismən açılmasına baxmayaraq, rəsmi Pekin təhlükənin hələ də yüksək olduğunu və vətəndaşların sağlamlıq üçün riskli yerlərdən uzaq durmalı olduqlarını bildirib.
Nazirliyin bəyanatında həmçinin vurğulanıb ki, hazırda İranda olan şəxslər əlavə ehtiyat tədbirləri görməli, bu ölkəyə səfər planlaşdıranlar isə mövcud şərtlər daxilində bütün səfərlərini ləğv etməlidirlər. Çinin bu kəskin addımı regionda genişmiqyaslı hərbi əməliyyatların başlaya biləcəyi barədə ehtimalları daha da gücləndirib.
Beynəlxalq müşahidəçilər Pekinin bu qərarını İran ətrafındakı təhlükəsizlik mühitinin nəzarətdən çıxdığının ən bariz göstəricisi hesab edirlər. Hazırda bir çox ölkənin diplomatik nümayəndəlikləri də bənzər xəbərdarlıqlar yaymaqda davam edir.
