Türkiyə NATO-nun şərq cinahında yerləşən qüvvələrin yanacaq təminatı üçün yeni hərbi neft kəməri layihəsi təklif edib.
Bloomberg-in yaydığı məlumata görə, layihənin ümumi dəyəri təxminən 1,2 milyard dollar təşkil edir. Ankara NATO müttəfiqlərinə Bolqarıstan üzərindən Rumıniyaya qədər uzanacaq yeni boru xəttinin çəkilməsini təklif edib.
Məlumata əsasən, yeni sistem hərbi məqsədlər üçün istifadə olunan yanacaq növlərinin operativ daşınmasını təmin etməyə hesablanıb. NATO ölkələri isə mümkün Rusiya ilə silahlı qarşıdurma ssenarisində qoşunların fasiləsiz yanacaqla təmin olunması üçün bu cür hərbi boru kəməri şəbəkəsinin genişləndirilməsini vacib hesab edir.
Qeyd olunur ki, Türkiyə iyul ayında keçiriləcək NATO sammitinə ev sahibliyi edəcək.(Musavat.com)
