Ermənistan baş naziri Nikol Paşinyan Axalkalaki-Qars dəmir yolu marşrutunun Ermənistan yükləri üçün açılması qərarına görə Bakı və Ankaraya minnətdarlığını bildirib.
Bunu Ermənistanın baş naziri Nikol Paşinyan regionda nəqliyyat sektorundakı son prosesləri, Bakı-Tbilisi-Qars dəmir yolunun yenidən istifadəyə verilməsi və Ermənistanın da bu yoldan faydalanmasını şərh edərkən deyib.
“Axalkalaki-Qars dəmir yolu marşrutunun həm ixrac, həm də idxal üçün Ermənistan malları üçün açılması qərarına görə minnətdarıq”, - deyə o qeyd edib.
Paşinyanın sözlərinə görə, hazırda Ermənistan və Türkiyə arasında əməkdaşlıqda müsbət dinamika müşahidə olunur, lakin mənalı nəticələr əldə etmək üçün əlavə səylər göstərilməlidir.
"Türkiyə ilə münasibətlərimizdə çox yaxşı impuls var və hazırda bundan məmnunuq. Lakin son irəliləyiş əldə etmək üçün bu impuls qorunub saxlanılmalıdır. Mən diplomatik münasibətlərin qurulmasını və əlbəttə ki, sərhədlərin tam açılmasını nəzərdə tuturam", - baş nazir bildirib.
Azərbaycanla münasibətlərdən danışan Paşinyan xatırladıb ki, tərəflər artıq sülh müqaviləsinin mətni ilə bağlı razılığa gəliblər və indi onu imzalamağa keçməlidirlər.
"Azərbaycana gəldikdə isə, bilirsiniz ki, bizim ilkin sülh müqaviləmiz var. Biz onu imzalamalıyıq", - Paşinyan deyib.
