Çin ilk dəfə beynəlxalq ictimai rəydə ABŞ-ı geridə qoyub. ABŞ-ın nüfuzlu Pew Research Center analitik mərkəzinin keçirdiyi sorğuya əsasən, dünyanın əksər ölkələrində Çinə münasibət artıq ABŞ-dan daha müsbətdir.
Araşdırma 2026-cı il 8 fevral – 13 may tarixləri arasında 36 ölkədə 42 151 nəfər arasında aparılıb.
Sorğunun nəticələrinə görə, Çin 36 ölkənin əksəriyyətində ABŞ-dan daha müsbət qiymətləndirilir. Eyni zamanda, Çin Prezidenti Si Cinpinə etimad ABŞ Prezidenti Donald Trampa olan etimadı üstələyib.
Pew Research Center bildirir ki, vəziyyət Co Baydenin prezidentliyinin ikinci yarısında tam əksinə idi. Həmin dövrdə Baydenə etimad Si Cinpinə olan etimaddan daha yüksək idi.
Araşdırma müəlliflərinin fikrincə, bu dəyişiklik iki əsas amillə bağlıdır. Bir tərəfdən son illərdə Çinə münasibət tədricən yaxşılaşıb, digər tərəfdən isə xüsusilə Donald Trampın ikinci prezidentlik müddətinin başlamasından sonra ABŞ-a münasibət nəzərəçarpacaq dərəcədə pisləşib.
Sorğuda ən böyük fərq Asiya-Sakit okean regionu və Yaxın Şərq ölkələrində qeydə alınıb.
Diqqətçəkən məqamlardan biri də ABŞ-ın yaxın qonşuları olan Kanada və Meksikada Çinə münasibətin artıq ABŞ-a münasibətdən daha müsbət olmasıdır.
Araşdırmaya görə, ABŞ yalnız altı ölkədə üstünlüyünü qoruyub saxlaya bilib. Bu ölkələr sırasında Hindistan, Yaponiya, Filippin və Cənubi Koreya da yer alır.
