"Baş katibin və hörmətli nazirlərin qarşısında bir daha çağırış edirəm. Xahiş edirəm ki, ukraynalı rəsmilərə Buça şəhərində cəsədləri göstərilən şəxslərin ad siyahısının yayımlanması üçün çağırış etsinlər”.
Bu sözləri Rusiyanın xarici işlər naziri Sergey Lavrov Birləşmiş Millətlər Təşkilatının (BMT) Təhlükəsizlik Şurasında çıxışı zamanı deyib. O, bir aydır Rusiyanın bu tələbinə cavab verilmədiyini söyləyib:
“Cənab Baş katib, ən azından səlahiyyətlərinizdən istifadə edin. Bu səhnələşdirmədən dərhal sonra qərbli həmkarlarımız qəzəblənərək Rusiya Federasiyasına qarşı sanksiya paketi təqdim etdi. Bizi əsassız şəkildə mülki vətəndaşları öldürməkdə ittiham etdiklərinə diqqət çəkmək istəyirəm”.
Rusiya XİN başçısı həmçinin Kiyev rəhbərliyinin 2014-cü ildən bəri Donetsk və Luqansk Respublikalarının sakinlərinə qarşı çoxu hərbi cinayətlər törətdiyini deyib .
“Bizim əlimizdə Kiyev rejiminin 2014-cü ildən bəri müntəzəm olaraq törətdiyi cinayət əməllərinə dair çoxlu sübutlar var”,- deyə o bildirib.
“Belə başa düşürəm ki, bugünkü iclas Ukraynada baş verənlərin cəzasız qalmaması ilə bağlıdır. Məncə, bu, çox yerində atılmış bir addımdır. 2014-cü ildən bəri bu ölkədə yaşananlar mövzunu ehtiva edir. Radikal qüvvələr, Rus düşmənləri və neo-nasistlər və Qərb dövlətlərinin birbaşa dəstəyi ilə hərbi çevriliş nəticəsində iqtidara gəldilər və dərhal sonra əsas insan hüquqlarını saymamağa başladılar” - Lavrov əlavə edib.
Qeyd edək ki, Rusiya-Ukrayna müharibəsində Buçanın işğalı zamanı yerli əhali arasında Rusiya Silahlı Qüvvələri tərəfindən kütləvi qətl və işgəncələr törədilib. Ukrayna mənbələrinin yazdığına görə, qətliam nəticəsində 1000-dən çox insan öldürülüb.
