Dünyanın əksər hərbi mütəxəssisləri və analitikləri, antiterror mütəxəssisləri, istefada olan kəşfiyyat və ordu generalları HƏMAS-ın hücumunda İsrail ordusunun uğursuzluğunun nə üçün baş verdiyini düşünür. Əksər ciddi media qurumları baş verənləri məhz İsrail kəşfiyyatının “çöküşü” kimi dəyərləndirirlər.
Bunu IT sahəsi üzrə ekspert Osman Gündüz deyib. O bildirib ki, analitiklər bunu “Pill-Harbor” və “11 Sentyabr” hadisələri ilə müqayisə edirlər:
“Nəhəng resurslara və texnologiyalara, radio-elektron vasitələrə, agentura şəbəkəsinə malik olan İsrail kəşfiyyatının çöküşünün ağlabatan bir açıqlamasına və izahına rast gəlmədim. Yəqin, HƏMAS-ın bəsit texnologiyalarına, motorlaşdırılmış paraşütləri və motosikletlərinə qarşı İsrailin müasir texnologiyasının dayanıqlı ola bilməməsi uzun müddət müzakirə predmeti olacaq”.
Ekspert uzun illərdir Azərbaycan və İsrailin hərbi texnologiyalar sahəsində ciddi əməkdaşlıq etməsinə də toxunub:
“Bu faktor Qarabağ məsələsinin həllində mühüm rol oynayıb. Bu ildən isə artıq kosmos texnologiyaları sahəsində biz İsraili əsas partnyor olaraq seçmişik və bir neçə gün öncə başa çatan Astronavtika Konqresində kosmos sahəsində İsrail şirkətləri ilə müqavilə də imzalanıb.
Kibertəhlükəsizlik sahəsində də əsas partnyorumuz İsrail və Türkiyədir”.
“Belə bir durumda, düşünürəm ki, İsrail kəşfiyyatı və ordusunda buraxılan səhvlər və uğursuzluqlar, onların səbəbləri bizim üçün də mühüm əhəmiyyət kəsb edir”, - deyə O. Gündüz əlavə edib.
