Ukrayna Silahlı Qüvvələrinin Baş qərargahı müharibənin 43-cü günündə cəbhədəki vəziyyəti açıqlayıb.
Məlumatda deyilir:
"İşğalçıların əsas səyləri Ukraynanın şərqində Donetsk və Luqansk vilayətləri ərazisinə tam nəzarəti bərqərar etmək məqsədi daşıyan hücum əməliyyatına hazırlığa yönəlib.
Düşmən Slobojanski, Donetsk, Pivdennobuzski və Tavriya istiqamətlərində fəallığını davam etdirir.
Slobozhanski istiqamətində rus düşməni Xarkov şəhərini mühasirəyə almağa və artilleriyadan atəşə tutmağa davam edir.
Çıxarılan rus bölmələrinin bir hissəsi Rusiya Federasiyasının Ukrayna ilə həmsərhəd olan bir sıra regionlarında çadır şəhərciklərində yerləşir. Rusiya hərbçiləri Ukrayna ərazisində növbəti hərbi əməliyyatlarda iştirak etməkdən imtina edirlər.
Rusiyanın hərbi komissarlıqları 2012-ci ildən hərbi xidmətdən tərxis olunmuş, sürücü, mexanik-sürücü, kəşfiyyatçı və kiçik komandir hərbi ixtisaslarına malik çağırışçılarla işi gücləndirib.
Rusiya işğalçıları müvəqqəti işğal etdikləri ərazilərdə dinc əhaliyə qarşı zorakılıq tətbiq etməkdə davam edirlər. Mariupol əhalisi məcburi şəkildə Donetsk vilayətinin müvəqqəti işğal olunmuş rayonlarına deportasiya edilir.
Ukrayna Silahlı Qüvvələrinin Hərbi Hava Qüvvələri ötən gün qanadlı raket, PUA və döyüş təyyarəsi olmaqla üç hava hədəfini vurub. Hərbi Hava Qüvvələri işğalçı qüvvələrə raket və bomba zərbələri endirməyə davam edib".
